AY DILDARA MIN(Helbest)

Çi çîroka evînê bihata gotin

Laşê min û te di hilweşa ser,

Serdemê me temenê xwe dihûnand

Lê niha çavên te bizdonek bûne

Ma ez ji çiqlê dara evînê ketim…

De ka bêje,

Şopên awirên kêne  mayî li nav çavên te

Ay dildara min

Çi helbesta evînê bihata nivîsandin

Peyva helbestê ya hêrî nexşîn ez û tu bûn

Em şagirtên qesra bextewariyê bûn

Lê niha hestên te koçber bûne

Ma ez ji textê dilê te ketim

Deka bêje,

Ew kî ye rûniştî li ser hêsîra dilê te

Ay dildara min

Çi wargeha evînê rûyê min û te biçûya li nav

 Demsala wê dibû bihar

Demê wêneyê xwe li ser rûyê me xêz dikir

Lê niha rengê cûda bûnê  li ser rûyê te

Ma ez ji neynika rûyê te ketim

Deka bêje

Ew kî ye xwe li xewnên te alandî

Ay dildara min

Çi bayê evînê bihata min û te beralî dida

Zarokên bêguneh demsal dizivirand

Pifên lêvên  me bo bazbend ji bo jana evînê

Lê niha navê min li ser ezmanê te zenînok dimîne

Ma ez ji ayeta evînê derketim

Deka bêje

Ew navê kî ye li ezmanê te aliqî

Ew nexşejiyana min û te çêkirî

Bi hibra evînê

Deka bêje

Ma cihê min li kûye

Ay dildara min

                          2002/

                           Robar BÊWAR